شسالفة قفزة فيلكس و قانون نيوتن ؟

أمس بتاريخ 14/10/2012 الحبيب فيلكس كان فاضي و ما عندة شغل فا قرر ان يصعد حق ارتفاع 38 كيلومتر فوق سطح البحر و يقط نفسة من هناك .. و ترا دق عليي قالي ادعيلي حجي حمزة ترا دعوتك مستجابة فا دعيتلة و بفضل دعوتي الحمدلله انجحت القفزة (لحد يصدق) .. المهم بس ما نزل و خلص شغلة بلشوا الفاضين نفسة يألفون اشاعات عنة و عن قانون نيوتن و انا شخصيا من امس للحين قام اسمع نفس النكت و نفس القطات عن هذول الاثنين (يعني فلوها) .. المهم من اقوى الاشاعات اللي طلعت على فيلكس ان قدر يكسر قانون الزلم و الوحش نيوتن مال الجاذبية الارضية و الكل قام يتحلطم شلون طول هالمدة درسونا قوانين غلط بالمدرسة و شلون و شلون .. فا قلت احسن شي اسويه لكم يا ناس و يا عالم اني اشرحلكم شعلاقة قفزة فيلكس بقانون نيوتن و شلون نقدر انقول ان اللي امطلع هالاشاعة انسان دايخ و ما عندة شغل و نقدر نقول ان كلامة خربوطة مربوتة ؟؟؟

بسم الله !

قانون نيوتن العام : القوة المؤثرة على الجسم حسب موقعه (يعني على جبل و لا عالارض و لا و لا) تساوي الجاذبية الارضية ضرب الكتلة رقم 1 ضرب الكتلة رقم 2 تقسيم المسافة بين الكتلتين

قانون نيوتن حق الاجسام الساقطة او السقوط الحر اللي نقدر انقول محور حديثنا لهذا الموضوع : العجلة تساوي القوة تقسيم الكتلة

القانون الثاني اهو اللي يتعلق بموضوعنا و اللي اهو قفزة فيلكس .. شنو علاقتها ؟
بريان أرتلي المسؤول عن الإثبات و التسجيل حق قفزة فيلكس اصدر بيان ان فيلكس تعدى سرعة الصوت .. انزين للحين ما عرفنا شنو العلاقة بينهم ؟!
القانون الثاني يقول ان الاجسام جميعها بغض النظر عن كتلتها راح تطيح بنفس الوقت .. يعني لو نييب بيضة مع رقية بنفس الارتفاع و انقطهم بنفس الوقت راح انشوفهم يطيحون مع بعض بس لازم يكون بالفراغ .. بس نيوتن قال اخر شي بشرط اذا الجسم طاف حاجز الصوت .. يعني اذا العجلة بالاحوال القياسية تساوي 9,8 اذا الجسم طاف هالرقم راح يعتبر ان طايف حاجز الصوت .. يعني نيوتن ما قال ان الاجسام ما تقدر تطوف حاجز الصوت .. يعني سالفة القفزة مالها شغل بقانون نيوتن !

مني نقدر انقول ان نيوتن ما قال ان الاجسام ما تقدر تتحرك او تطوف حاجز الصوت .. و مني الحبايب او الحبيب اللي الف اشاعة ان فيلكس قدر يحطم او يكسر قانون نيوتن اقدر اقولة ارحل و العب غيرها حجي !

ملاحظات سريعة :
1- جسم الإنسان ما يقدر يتحمل ان يتحرك اسرع من الصوت الا اذا كان لابس بدلة واقية .. نفس الطيارات الحربية اللي تطير اسرع من الصوت الجسم البشري اللي داخل ما يتاثر لان جسم الطيارة قام يحميه !
2- يمكن في علماء أول قالوا ان جسم الإنسان ما يقدر يكسر حاجز الصوت و اعتقد قالوا هالكلام لان ايامهم ما كان عندهم المعدات المطلوبة !
3- في مؤثرات اثرت على قفزة فيلكس غير الجاذبية و الارتفاع و الكتلة .. كلنا ندري ان كلما نصعد فوق درجة الحرارة تقل فا نقدر انقول حتى درجة الحرارة اثرت عالقفزة !

السيرة الذاتية لفيلكس :
اسمة : Felix Buamgartner
انولد بسنة : 1969
مكان ولادتة : النمسا
الأرقام القياسية اللي حطمها :
1- أعلى ارتفاع للسقوط الحر
2- اسرع قفزة سقوط حر

شكر خاص لـ :
1- رانيا بوحمد
2- سارة العتيبي
الصراحة اهم اللي شرحولي السالفة و وضحولي كل شي فا يعني تقدرون تقولون ان اغلب الموضوع ياي منهم و من شرحهم

بعض الصور حق قفزة فيلكس و الفيديو و اهو قام ينط :

حمزة